29 март куни Туркия президенти Ражаб Таййип Эрдўған мамлакатда коронавирусга чалиниш ҳолатлари кўпайиб бораётганини айтиб, чекловлар кучайтирилишини маълум қилди.
Эрдўған муборак Рамазон ойида ҳафта охирида локдаун ҳолати жорий қилинишини, ресторанларда мижозларга фақат етказиб бериш ва олиб кетиш хизматинигина кўрсатилишини айтагн. Шунигдек, бутун мамлакат бўйлаб кечки соат 9 дан эрталаб 5 гача жорий қилинган комендантлик соати давом этади.
Туркия Соғлиқни сақлаш вазирлигининг маълум қилишича, мамлакатда 28 март куни 32 404 кишининг коронавирусга чалингани аниқланган. Бу Туркияда 2021 йилда қайд этилган энг кўп кунлик кўрсаткич ҳисобланади. Бу мамлакатда шу пайтгача 3 240 577 кишига CОVID-19 ташхиси қўйилган ва уларнинг 30 мингдан ортиғи вафот этган.
Ҳозирда Туркиядаги энг йирик икки шаҳар бўлган Анқара ва Истанбул ҳам коронавирус хавфи юқори бўлган ҳудудлар қаторига киритилган. 84 миллион киши яшайдиган Туркияда аҳолининг деярли 80 фоизи коронавирус бўйича ҳолат ёмон бўлган ҳудудларда яшамоқда.
Uzbek