30 декабрь куни АҚШ Хитойда қамоққа олинган уйғур милллатига мансуб шифокор Гулшан Аббоснинг озод қилиниши талаб қилди. Шифокорнинг айни пайтда АҚШда яшаётган қариндошларининг сўзларига кўра, у 20 йиллик қамоқ жазосига ҳукм қилинган. Бунга Гулшан Аббос қариндошларининг АҚШда туриб инсон ҳуқуқларини ҳимоя қилиш борасида олиб борган ҳаракатлари сабаб бўлган.
Гулшан Аббоснинг қизи Зиба Муратнинг айтишича, унинг онаси 2018 йилнинг сентябрида ғойиб бўлган. Гулшан ўтган йилнинг март ойида терроризм бўйича айбланиб қамоққа ҳукм қилинган. Аббоснинг оиласи бу ҳақда яқиндагина хабар топган.
Зиба Мурат онасига қўйилган айбловларни «абсурд» деб атади. Гулшаннинг синглиси Рушан Аббоснинг айтишича, Хитой ҳукумати Гулшаннинг синглиси Рушан ва укаси Ришат Аббосларнинг АҚШдан туриб олиб борган ишлари туфайли уни ҳибсга олган.
«Биз ўз халқимизнинг ҳуқуқларини ҳимоя қилиш ва адолат ўрнатиш учун ишлашни ўз зиммамизга олдик. Бунинг эвазига опамиз жазоланди» дейди Рушан.
АҚШ давлат котибининг демократия, инсон ҳуқуқлари ва меҳнат масалалари бўйича ёрдамчиси Роберт Дестро ўзининг Твиттер саҳифасида Гулшан Аббос озод қилиниши кераклигини айтди.
«Гулшан йўқолиб қолди, мажбурий равишда ҳибсга олинди ва унга Хитой Коммунистик партияси томонидан қаттиқ жазо тайинланди. Бу бир оиланинг ўз ҳуқуқини ҳимоя қилиш мақсадида қилган ҳаракатлари учун жазоланганига далилдир. Хитой ҳукумати инсон ҳуқуқларини ҳурмат қилмайди» дейди Дестро.
Зиба Мурат хавфсизлик нуқтаи назаридан онасига қилинган ҳукм бўйича маълумотларни ким етказганини ошкор қила олмаслигини айтди.
«Биз фақат унинг 20 йилга озодликдан маҳрум қилинганинигина билиб олдик ва бу ҳақда кўпроқ маълумот олишга ҳаракат қилмоқдамиз. Онам тиббиёт ходими, унинг сиёсатга алоқаси йўқ. У меҳрибон инсон, у бутун умрини одамларга ёрдам беришга сарфлаган» дейди Зиба Мурат.
Унинг қўшимча қилишча, қамоққа олинмасдан олдин ҳам онасининг соғлиғи ёмон аҳволда бўлган ва у юқори қон босимидан азият чекарди.
Бирлашган Миллатлар Ташкилоти экспертлари Хитойнинг Шарқий Туркистон (Шинжон) минтақасидаги лагерларда камида бир миллион нафар уйғурлар ҳибсга олинганлигини айтиб келишади. Хитой уйғурлар ташланган лагерларни ўқув ва касб-ҳунар ўргатиш марказлари эканинини айтиб, ҳозирда у ердаги барча одамлар курсларни «битирган» ва уйларига кетганини таъкидламоқда. Аммо, бундай лагерларга кириш чекланган, шунинг учун уларнинг барчаси ёпилганлигини мустақил равишда текширишнинг иложи йўқ.
Uzbek