Украина президенти Владимир Зеленский Россия президенти Владимир Путинга Донбасснинг исталган жойида учрашишга таклиф қилди.
Сешанба куни тарқалган видеомурожаатида у 19 апрель куни Нормандия тўртлигининг сиёсий маслаҳатчилари йиғилишида вазиятга имкон қадар ойдинлик киритиш мақсадида учрашиш таклифи билдирилганини айтди.
«Мен бундан ҳам узоқроққа боришга ва сизни Донбасснинг уруш бўлган ҳар қандай қисмида учрашишга таклиф қилишга тайёрман», деди у Россия Федерацияси Президентига мурожаат қилиб.
Зеленскийнинг таъкидлашича, Украина тинчлик учун дипломатик воситалар билан курашишга ва шу билан бирга ўзини ҳимоя қилишга тайёр. «Украина урушни хоҳлаяптими? Йўқ. Бунга тайёрми? Ҳа. Украина дипломатик йўллар билан тинчлик учун курашни тўхтатадими? Ҳеч қачон.
Aгар бирор нарса юз берса, Украина ўзини ҳимоя қиладими? Ҳар доим. Бизнинг принципимиз оддий – Украина биринчи уруш бошламайди, лекин ҳар доим охиригача туради «, деди президент Зеленский ўз мурожаатида.
Uzbek