Туркия келаси ҳафта ҳибсдаги ИШИД жангариларини ватанларига қайтариб юборишни бошлайди. Бу ҳақда жума куни ички ишлар вазири Сулаймон Сойлу хабар берди: “Биз экстримистларни ўзлари келган давлатларига қайтариб юбормоқчимиз. Биз буни душанба куни бошлаймиз». Шу ҳафта бошида Сойлу Туркия 1200 га яқин ИШИД аъзоларини ҳибсга олганини айтганди. Хусусан, яқинда Суриянинг шимолидаги ҳарбий операция давомида 287 киши асирга олинган.
Туркия Ғарб давлатларини ИШИД таркибига қўшилиш учун Сурия ва Ироққа келган фуқароларини қайтариб олмагани ва уларнинг бир қисмини фуқароликдан маҳрум қилгани учун танқид қилганди.
Uzbek