Коронавирус тарқалган кўплаб шаҳарларда юз ниқоблари eтишмаслиги ҳақида хабар берилмоқда. Сабаби, кўп одамлар ўзларини «ўта юқумли» бўлган ушбу инфекциядан ҳимоя қилишга ҳаракат қилмоқдалар.
Бироқ, кўпчилик билмайдиган нарса шуки, коронавируснинг янги тури – 2019- nCoV ҳаво орқали юқади ва шунинг учун юз ниқобини тақиш ундан сақланиш учун етарли эмас, дея маълумот берди Финляндиянинг ҳаво тозалашга ихтисослашган “Genano” компанияси.
«Ҳатто HEPA фильтрли ниқоблари ҳам вирусдан муносиб ҳимояни таъминламайди, чунки улар 0,3 ум гача катталикдаги инфекцияни ўтказмайди. Коронавируснинг ҳажми эса 0,1ум дир (0,001 миллиметр)», деди “Genano” менежери Миа Шауман.
Финляндия компанияси Хитойда вируснинг тарқалишини тўхтатишга ёрдам бериш учун Жиангсу, Хубей ва Гуангдонг провинцияларидаги касалхоналарга ҳавони зарарсизлантирувчи жиҳозлар етказиб бериб, Хитой ҳукумати билан яқиндан ҳамкорлик қилиб келмоқда.
«Хитой биз билан биринчи бор алоқа қилганида, вазият ўта оғир эди ва биз 24 соат ичида 200 дан ортиқ жиҳозни жўнатдик», деди Шауман.
«Бизнинг Финляндиядаги корхонамиз кўпроқ жиҳоз етказиб бериш учун тун-у кун ишламоқда», дея қўшимча қилди у.
Хитойнинг марказий Ухан шаҳрида пайдо бўлган ҳалокатли вирус ҳозиргача 20 та мамлакат бўйлаб тарқалиб, 170 кишининг ҳаётига зомин бўлди. Яна 8000 киши коронавирусни юқтиргани айтилмоқда.
Uzbek