Индонезия Уламолар Кенгашининг жума куни маълум қилишича, ислом шариатига биноан Хитойнинг Sinovac Biotech компанияси томонидан ишлаб чиқарилган CОVID-19 вакцинаси ҳалол ҳисобланади. Индонезияда бир неча кундан кейин Хитойнинг ушбу вакцинаси билан одамларни эмлаш дастури бошланади.
Дунёдаги энг кўп мусулмонлар яшайдиган мамлакат ҳисобланувчи Индонезияда 3 миллион дозада Sinovacнинг CoronaVac номли вакцинаси мавжуд. Бу мамлакатда 13 январдан бошлаб аҳолини эмлаш бошланиши режалаштирилган ва вакцинани биринчи бўлиб мамлакат раҳбари Жоко Видодо қабул қилади.
Уламолар Кенгашининг фатво комиссияси вакили Асрорун Ниам Шолеҳ 8 январь куни бўлиб ўтган матбуот анжуманида CoronaVac «муқаддас ва ҳалол» эканлигини таъкидлади.
«Бу одамларни, айниқса мусулмонларни тинчлантирадиган маълумот бўлиши мумкин» дейди Ниам.
Аммо, Индонезиянинг озиқ-овқат ва гиёҳванд моддалар агентлиги ушбу вакцинадан фойдаланиш учун ҳали рухсат бергани йўқ.
Sinovacнинг CoronaVac вакцинаси синовларнинг сўнгги босқичида коронавируснинг олдини олишда 78 фоиз самара кўрсатган ва уни қабул қилганларда ҳеч қандай жиддий акс таъсирлар қайд этилмаган.
Uzbek