Саудия Арабистони қироли Салмон CОVID-19 вакцинасининг биринчи дозасини қабул қилди.Бу ҳақда Саудия Арабистони матбуот агентлиги 8 январь куни хабар қилди.
“Бугун икки муқаддас масжиднинг қўриқчиси (Қирол Салмон) вакцинани қабул қилди. Худо уни асрасин. Қиролнинг ушбу ташаббуси Саудиянинг вирусни даволашдан кўра уни олдини олишга кўпроқ эътибор бераётганидан далолатдир” дейди Соғлиқни сақлаш вазири Тавфиқ Ар-Робиа.
Бундан аввал Саудия ҳукуматининг бир қатор мулозимлари, жумладан, валиаҳд шаҳзода Муҳаммад бин Салмон ҳам Pfizer компанияси вакцинаси билан эмланганди.
Саудияда ҳозиргача бир миллион киши вакцина қабул қилиш онлайн рўйхатдан ўтган бўлиб, уларнинг 100 минг нафари эмланиб бўлган. Бу мамлакатда 8 январь ҳолатига кўра 363 582 киши коронавирусга чалинган ва уларнинг 6282 нафари вафот этган.