Теҳрон Вашингтон санкцияларини бекор қилса ва Оятиллоҳ Али Хомений буни маъқулласагина музокаралар олиб бориши мумкин, дейилади ИРНА ахборот агентлиги хабарида.
“Америка билан музокаралар АҚШ президенти Дональд Трамп санкцияларни олиб ташласа ва бизнинг олий раҳнамойимиз бундай музокараларни олиб боришга рухсат берсагина Эрон томонидан қайта кўриб чиқилиши мумкин,» дейди чоршанба куни кечқурун Маҳмуд Алави.
«Америкаликлар Эроннинг ҳарбий кучидан қўрқишди, бу эса Эронга ҳужум қилиш қарорини бекор қилишлари учун сабаб бўлди».
Ўтган ой Трамп, Эронга 20 июнь куни Ҳормуз бўғозида Эрон томонидан уриб тушурилган АҚШ ҳарбий учувчисиз учоғи учун интиқом олиш мақсадида ҳарбий зарба беришга буюруқ берган эди, лекин сўнгги дақиқаларда Трамп ушбу буйруқни бекор қилган. Ҳужум оқибатида 150 киши ҳалок бўлиши мумкин эди.
Теҳроннинг таъкидлашига кўра, учувчисиз учоқ Эроннинг ҳаво ҳудудида ер-ҳаво ҳимоя тизими ракетаси билан уриб туширилган, Вашингтон эса учоқ халқаро ҳаво ҳудудида бўлганини таъкидламоқда.
Эроннинг хом нефть экспорти кўринишидаги хорижий даромадлари оқимига қаратилган АҚШ санкцияларига жавобан, Эрон май ойида ядро келишуви бўйича ўз мажбуриятларини камайтиришни режалаштираётганини эълон қилди.
«Ядровий битимдан чиқиб кетган Трамп дипломатия йўлини ёпиб қўйди … барча таҳдидларга қарши энг яхши антидот – бу қатъий қаршилик», – дейди Эрон Миллий Хавфсизлик Кенгашининг матбуот котиби Кейван Хусрави.
Uzbek