9 март куни Вашингтонда жойлашган Сиёсат ва стратегия институти экспертлари баёнот бериб, Хитой ҳукуматининг Шарқий Туркистонда яшовчи уйғурларга нисбатан геноцидни (бутун миллатни қириб юборишга қаратилган ҳаракат) амалга ошираётганини айтишди. Уларнинг сўзларига кўра, Хитойнинг уйғурларга қилаётган муносабати БМТнинггеноцид бўйича қабул қилинган конвенсияснинг ҳар бир бандини бузмоқда.
Ҳуқуқни ҳимоя қилувчи экспертларнинг маълум қилишича, ҳозирда Хитойнинг Шарқий Туркистон ҳудудида бир миллиондан ортиқ уйғурлар ва мусулмон бўлган бошқа миллат вакиллари ҳибсхоналарда сақланмоқда. Хитой ҳукумати мазкур ҳибсхоналарни “қайта тарбиялаш ва касб-ҳунар ўргатиш” лагерлари эканини таъкидлаб, у ерда уйғурларга зулм қилинаётганини рад этиб келмоқда.
«Уйғурлар лагер мансабдорлари томонидан мунтазам равишда қийноққа солиниб, уларга шафқатсиз муомала қилинмоқда. Жумладан, улар жинсий зўрлаш, эксплуатация ва омма олдида камситилишидан жиддий жисмоний ва руҳий зарар кўрмоқда» дейилади, Сиёсат ва стратегия институти экспертлари берган хабарда.
Шу йилнинг январ ойида Трамп бошчилигидаги АҚШ ҳукумати Хитойнинг уйғурларга қилаётган зулмини геноцид, деб эълон қилганди. Феврал ойида эса Канада парламенти Хитойнинг бу ишларини геноцид деб аташ бўйича қарорни маъқуллаганди.
Uzbek