АҚШ Россия билан ядро қуролларидан фойдаланишни чекловчи «Янги СТАРТ» шартномасини беш йилга узайтирди, дея хабар берди Қўшма Штатларнинг давлат котиби Антони Блинкен.
«Президент Байден Америка халқини ядро таҳдидларидан сақлашга ваъда берганди. У бунга ядро қуролларини тарқатмаслик ва дунёда қуролланиш бўйича АҚШ етакчилигини тиклаш орқали эришилишини ҳам таъкидлаган. Бугун Қўшма Штатлар Россия Федерацияси билан «Янги СТАРТ» шартномасини беш йилга узайтирди ва ушбу ваъдани бажариш учун биринчи қадамни қўйди» дейди Блинкен.
Россия Президенти Владимир Путин 29 январь куни ушбу шартномани узайтирувчи қонунчиликни имзолаганди. Аввалги келишувга кўра, «Янги СТАРТ»нинг муддати 5 февралда тугаши керак эди.
«Янги СТАРТ» шартномаси Совуқ Урушнинг собиқ рақиблари бўлган АҚШ ва Россия ўртасидаги қуролларни камайтириш бўйича сўнгги битим ҳисобланади. Ушбу шартнома 2010 йилда имзоланган бўлиб, у Москва ва Вашингтондан ядро каллаклар сонини 1550 тадан оширмасликни талаб этади.
Uzbek