Испания Европа Иттифоқининг дори-дармон бўйича органи Sputnik V вакцинасини маъқуллаган тақдирда ундан фойдаланишга қарши эмас, деди чоршанба куни Испания Соғлиқни сақлаш вазири Каролина Дариас.
Россия ўтган йилнинг ёзида ўзининг ҳали синовларнинг барчасидан ўтиб улгурмаган Sputnik V вакцинасини рўйхатдан ўтказганди. Кўплаб мамлакатлар Россиянинг ушбу ҳаракатини қоралашди.
Лекин, 2 февраль куни Lancet номли тиббиёт журналида чоп этилган мақолада айтилишича, Sputnik V вакцинасининг учинчи босқич синовларида 20 минг киши қатнашган ва ушбу вакцинанинг самарадорлиги 90 фоиздан ошиқроқ бўлди. Бу эса Sputnik V нинг Moderna ва Pfizer вакциналари билан бир хил самарадор эканини кўрсатди.
«Испания Европа Дори-дармон Агентлиги томонидан маъқулланган ҳар қандай вакцинани қабул қилишга тайёр. Европа Дори-дармон Агентлигининг тасдиғи ҳар қандай вакцинани сотиб олишимиз учун ягона шарт ҳисобланади» деди Дариас Россия вакцинасидан фойдаланиш ҳақида берилган саволга.
Ҳозригача Sputnik V вакцинаси 15 дан ортиқ мамлакатларда, жумладан, Белоруссия ва Арманистон каби собиқ Совет давлатлари, Венесуела ва Эрон сингари Россия иттифоқчилари, шунингдек, Аргентина, Жазоир, Тунис ва Покистонда тасдиқланган.