Дунёнинг саҳий миллиардерларидан бири бўлган АҚШлик Бил Гейц CОVID-19 га қарши дори воситалари ва вакциналарни биринчи навбатда энг кўп пул таклиф қилганларга эмас, балки уларга энг кўп муҳтож бўлаётган мамлакатларга етказиб бериш кераклигини таъкидлади ва агар бундай қилинмаса, ушбу пандемия чўзилиб кетишини айтди.
“Агар биз дори ва вакцинани коронавирусдан энг кўп азият чекаётган мамлакатларга эмас, балки уларга энг кўп пул тўламоқчи бўлган давлатларга берсак, унда биз коронавирус узоқроқ давом этиши ва у сабаб янада кўпроқ одам ҳалок бўлишига гувоҳ бўламиз. Дори ва вакцинани давлатларга адолатли тарзда тақсимлаш учун бизга етакчилар керак” дейди Майкрасофт компанияси асосчиси Бил Гейц 11 июль куни ташкил этилган виртуал конференцияда.
Ҳозирда дунёда коронавирусга қарши юздан ортиқ вакцина устида иш олиб борилмоқда. Европа мамлакатлари ва АҚШ вакцина тадқиқотлари, уни синовдан ўтказиш ва ишлаб чиқариш учун миллиардлаб маблағни инвестиция қилишмоқда. Шунинг учун моддий жиҳатдан бой бўлган мамлакатлар коронавирусга қарши дориларнинг барчасини сотиб олиб, камбағал давлатларни қуруқ қўл билан қолдиришлари борасида қўрқувлар вужудга келмоқда.
Европа Комиссияси ва Жаҳон Соғлиқни Сақлаш Ташкилоти коронавирусни даволашда муваффақиятга эришган дориларни сотиб олишда носоғлом рақобат юзага келиши мумкинлигидан огоҳлантирган бўлиб, Вашингтоннинг баъзи расмийлари дори ёки вакцинани биринчи ўринда АҚШ фуқароларига етказиб берилишини айтишган.
Гейцнинг сўзларига кўра, йигирма йил аввал дунё мамлакатлари ОИВ ва ОИТСга қарши курашда бирлашганлари ва бу касалликларга қарши дориларни дунёнинг кўплаб ҳудудларига, жумладан Африкага етказиб берилгани ҳозирги CОVID-19 дориларини ҳам дунё бўйлаб кенг миқёсда тарқатилиши учун намуна бўлиб хизмат қилиши мумкин.
“ОИВ ва ОИТСга қарши курашда ўрганилган энг яхши сабоқлардан бири дориларни дунёдаги барчага етказиб бериш тизими яратилганидир” дейди Гейц.
Uzbek