30 январь шанба куни Ҳиндистонда фермерлар бир кунлик очлик намойишини эълон қилишди. Бу мамлакатда ўтган бир неча ҳафтадан бери ҳукуматнинг қишлоқ хўжалиги бўйича чиқарган янги қароридан норози бўлган фермерлар норозилик намойишларини уюштириб келишмоқда. Ушбу намойишларда ҳозиргача бир киши ҳалок бўлган ва юзлаб одамлар жароҳат олган.
Ҳинд фермерларининг даъволарига кўра, қишлоқ хўжалигига доир янги қонун фермерларнинг ҳисобига улардан маҳсулот сотиб оладиган катта хусусий шахсларга йирик миқдорда фойда келтиради. Шунинг учун Ҳиндистоннинг Нью-Деҳли шаҳри атрофида икки ойдан буён ўн минглаб фермерлар намойишлар орқали ўз норозиликларини билдиришмоқда.
Бугун Ҳиндистон мустақиллигининг асосчиси Маҳатма Гандининг ўлган куни ҳисобланади. Ушбу намойишларни уюштурган фермер раҳбарларининг айтишича,очлик намойишининг айнан шу кунда ўтказилиши унда ҳеч қандай зўравонликлар бўлмаслигини билдиради.
“Фермерларнинг намойиши тинчлик билан ўтди ва кейин ҳам шундай бўлади” деди Самюкт Кисан Морча фермерлар уюшмалари гуруҳининг етакчиси Даршан Пал.
Ҳиндистондаги 1.3 миллиард аҳолининг деярли ярми қишлоқ хўжалиги соҳасида ишлайди. Янги қонунга ўз ерига эга бўлган 150 миллионта фермер қарши чиқмоқда. Бу эса 2014 йилда ҳукумат тепасига келган Нарендра Моди учун энг катта қийинчиликка айланди.
Ҳозиргача ҳинд ҳукумати ва фермерларнинг касаба уюшмалари ўртасида 11 марта музокаралар ўтказилган бўлиб,уларнинг барчаси муваффақиятсиз чиқди.Ҳукумат янги қонунни амалиётга тадбиқ қилишни 18 ойга кечиктиришни таклиф қилган, аммо, фермерлар ушбу қонун бутунлай бекор қилинмагунча намойишлар тўхтамаслигини айтишмоқда.
Uzbek