Тайвань Ташқи ишлар вазирининг айтишича, Хитой демократик давлат бўлган Тайванни Гонгконгга айлантирмоқчи. Яъни, Хитой ҳукумати бу мамлакатнинг ҳам эркинликларини бўғиб,уни ўзига бутунлай бўйсундиришни режалаштирмоқда.
Хитой ҳукумати июн ойидан бошлаб Гонгконгда янги хавфсизлик қонунини жорий қилди. Шунингдек, Гонгконгдаги Хитой ҳукуматига қарши сиёсатчилар ишдан бўшатилди ва демократия фаоллари ҳибсга олинди.
Гонгконгдаги бу ҳолат Тайванни ҳам огоҳликка чақирди. Хитой 23 миллион киши яшайдиган бу орол мамлакатни ўзига тегишли ҳудуд эканлигини даъво қилади ва бир кун келиб бу ерни куч ишлатиб бўлса ҳам ўзига бўйсундиришга ваъда берган.
Тайвань Ташқи ишлар вазири Жосеф Ву АҚШ Вазирлар Маҳкамаси расмийси Алекс Азар билан бўлган учрашувда Тайвань ўзининг мустақиллиги Хитой томонидан олиб қўйилишидан доимий равишда хавотирланиб келишини айтди.
“Хитой Тайванни ўзининг сиёсий шартларини қабул қилишга мажбурлар экан бизнинг ҳаётимиз жуда қийинлашиб бормоқда. Хитой ҳукуматининг сиёсий шартлари Тайванни иккинчи Гонгконг айлантиради. Тайвань халқи ҳарбий, дипломатик ёки эпидемия каби таҳдидларни жуда яхши англайди” дейди Ву.
Хитой ҳукумати 2016 йилда Тайванда бўлиб ўтган президентлик сайловларидан бери бу мамлакатга нисбатан сиёсий, дипломатик ва ҳарбий босимларни кучайтириб келмоқда. Ўша йили Цаи Инг-Вен Тайвань президентлигини қўлга киритган эди.
У бу йилги сайловда ҳам катта устунлик билан ғалаба қозонди. Инг-Вен чин ҳукумати Тайванни Хитойнинг бир қисми эканлигини борасидаги позицияга қарши чиқади ва Тайванни аллақачон мустақил мамлакатга айланган деб ҳисоблайди.
Хитой ҳукумати Тайванга Гонгконгга қўлланилганидек “бир мамлакат, иккита тизим” моделини таклиф қилган. Унга кўра, Тайванда баъзи эркинликлар ва автономлик мақоми сақланиб қолади. Лекин, Тайвандаги барча катта партиялар бу таклифни рад этишган.
Uzbek