11 август сешанба куни Индонезияда коронавирусга қарши вакцинанинг одамлардаги синови бошланди. Мазкур вакцина Хитойнинг Sinovac Biotech компанияси томонидан ишлаб чиқарилган бўлиб, унинг Индонезияда бошланган олти ойлик синовларида 1600 киши қатнашмоқда.
Sinovac Biotech вакцинаси синовларнинг учинчи клиник босқичига етиб келган дунёдаги бир неча вакциналардан биридир. Вакцина синовларининг учинчи босқичида кўп сонли одамлар иштирок этади ва у кенг оммага тақдим қилинишдан олдинги энг сўнгги босқич ҳисобланади.
Sinovac Biotech’нинг CoronaVac номли ушбу вакцинасининг синовлари коронавирус тарқалиши бўйича дунёдаги иккинчи мамлакат бўлиб турган Бразилияда аллақачон бошланиб бўлган. Бу мамлакатда 9 000 нафар тиббиёт ходими мазкур синовларга жалб қилинган.
Аҳоли сони бўйича дунёда тўртинчи ўринда турган Индонезия коронавирус тарқалишини тўхтатишда қийинчиликларга дуч келмоқда. Ҳозиргача бу мамлакатда 127 мингдан ортиқ одамга CОVID-19 ташхиси қўйилган бўлиб, уларнинг 5700 нафаридан кўпроғи вафот этган. Лекин, касалланганларнинг асл сони ушбу расмий рақамлардан анча юқори эканлиги айтилмоқда. Чунки, бу ерда одамлар етарлича текширилмаяпти.
Агар ушбу вакцина синовлардан муваффақиятли ўтса, 270 миллион киши яшайдиган Индонезияда бу вакцинадан 250 миллион дозада ишлаб чиқариш бўйича режалар мавжуд.
Сешанба куни Индонезия президенти Жоко Видодо Бандунг шаҳридаги Bio Farma номли дори ишлаб чиқарувчи компанияга ташриф буюрди. Хитой вакцинасини кенг миқёсда ишлаб чиқариш айнан шу фирмада амалга оширилади.
“Мен шу нарсани яна бир бор таъкидлашни хоҳлайманки, Индонезиядаги барча одамлар эмланмас экан CОVID-19 хавфи тугамайди” деди Видодо.
Uzbek