Ўтган ҳафта Туркия президенти Ражаб Тоййиб Эрдоған Вашингтонга «тарихий» ташриф билан келди – ҳеч бўлмаганда мазкур ташриф турк матбуоти томонидан шундай баҳоланмоқда.
Икки томонлама музокаралар кун тартибида Суриядаги ҳарбий амалиёти туфайли АҚШнинг Туркияга қарши санкциялар жорий қилишидан тортиб, АҚШ Парламенти Вакиллар Палатасида Туркиянинг Биринчи Жаҳон Уруши даврида арманларга қарши содир этган хатти-ҳаракатларини геноцид, деб тан оладиган резолюциянинг қабул қилишига қадар бўлган долзарб масалалар ўрин олган.
Трамп-Эрдоған саммити дастлаб “плюс бир” форматида бўлиб ўтди, унда икки давлатнинг ташқи ишлар вазирлари, шунингдек, таржимонлар иштирок этди. Шундан сўнг тушлик ташкиллаштирилди, унда иккала делегация аъзолари ҳам иштирок этдилар.
Бундан кўриниб турибдики, ҳар иккала томон ҳам мунозарали масалаларнинг чексиз рўйхати бўйича кераксиз баҳсларга киришишнинг ҳожати йўқ, деган хулосага келишган.
Умуман олганда, ташриф ҳеч қандай мунозарали масалаларни ҳал қилгани йўқ. Шунчаки томонлар икки тарафлама фронтда вазиятни барқарор тутишга ҳаракат қилдилар, холос. Муаммолар ечимини топишга қаратилган музокаралар эса, қулай вазият туғилгунга қадар музлатиб қўйилди.
Шунингдек, анчайин мунозарали баҳсларнинг ёпиқ эшиклар билан чегараланиб қолинганлиги ва омма олдида ижобий нарсаларга кўпроқ урғу берилганлиги таҳсинга сазовор.
Энди эса кутиш қолди, ҳа, то Америка Оммавий ахборот воситалари Трамп-Эрдоған ўртасида ҳозирча ошкор этилмаган баҳсли мавзуларни бутун дунёга овоза қилишгунига қадар кутиш лозим. Аммо, ҳар ҳолда ўшанга қадар бўлган жараёндан келиб чиқиб айтиш мумкинки, ҳозирча АҚШ-Туркия фронтида ўзгариш йўқ.
Uzbek