Белоруссияда 30 август якшанба куни ҳам президентга қарши намойишлар давом этди. Минскдаги президент қароргоҳи яқинига тўпланган одамлар қизил ва оқ рангли мухолиф байроқларни кўтариб олишганди. Намойишчилар “Туғилган кунинг билан, каламуш” дея бақириб, 66 ёшга тўлган Лукашенконинг истеъфога чиқишини талаб қилишди.
Беларусда қаторасига икки ҳафтадан буён намойишлар давом этиб келмоқда. Шунга қарамасдан 26 йилдан бери мамлакат тепасида турган Александр Лукашенко президентликни топширмоқчи эмас. Унинг якшанба куни ўзининг резиденцияси атрофида қора кепка ва қўлида қурол билан сайр қилиб юргандаги суратлари тарқалди.
30 августда 66 ёшни қаршилаган Лукашенко бир неча ҳафтадан бери юз бераётган намойишлар ва иш ташлашларни бостиришда қийинчиликларга дуч келмоқда. Унинг мухолифлари 9 август кунги сайловларда ғирромлик ишлатилганини даъво қилишмоқда. Лукашенко эса сайловларда қаллоблик ишлатилганини рад этиб, мамлакатдаги намойишчиларни четдан қўллаб-қувватлашаётганини таъкидламоқда.
Ушбу намойишлар фонида Россия президенти Владимир Путин Лукашенкога қўнғироқ қилиб, уни туғилган куни табриклади ва Москвага таклиф этди. Бу эса ҳозирда тартибсизликлар ва Ғарб давлатларининг санкциялар таҳдиди билан курашаётган Лукашенкони рус ҳукумати қўллаб-қувватлашга тайёр эканлигининг белгисидир.
Белоруссия Россиянинг МДҲ давлатлари ичидаги энг яқин иттифоқдоши ҳисобланади. Белоруссия ҳудуди Москванинг Европадан ҳимояланиш стратегиясида ажралмас қисмга айланган.
Uzbek