Индонезияда янги коронавируснинг мутацияга учраган (гени ўзгарган) ва янада юқумлироқ бўлган тури аниқланди. Бу ҳақда Жакартадаги Молекуляр биология инстутути 30 август куни хабар берди.
Осиёнинг жануби-шарқий ҳудудида жойлашган Индонезияда коронавирус билан касалланиш ҳоллари кўпайиб бормоқда. Соғлиқни сақлаш вазирлиги якшанба куни 2858 кишининг CОVID-19 га чалингани ҳақида хабар қилди. Бу билан Индонезияда коронавирусни юқтириб олганларнинг умумий сони 172 053 кишига етди. Қурбонлар сони эса 7343 нафарни ташкил қилмоқда.
Молекуляр биология инстутути ректори ўринбосари Ҳеравати Судоёнинг айтишича, институт тўплаган намуналар коронавируснинг “юқумлироқ, лекин инсон ҳаётига хавфсизроқ бўлган” D614G номли мутациясини аниқланди. Судоё мамлакатда сўнгги пайтларда касалланганларнинг кўпайишига мутацияга учраган коронавирус сабаб бўлаётганини аниқлаш учун яна илмий изланишлар олиб борилиши кераклигини таъкидлаган.
ЖССТ коронавируснинг мутацияга учраган турини февраль ойидаёқ аниқланганини айтганди. Шундан бери гени ўзгарган коронавирус Европа ва Америка қитъаларида, шунингдек, Индонезиянинг қўшнилари Сингапур ва Малайзияда тарқалиб келмоқда.
Индонезия университети эпидимиологи Сяҳризал Сярифнинг огоҳлантиришига кўра, мамлакат ҳушёрликни сақлаб қолиши шарт. У Индонезияда коронавирусга чалинганлар йил сўнггига қадар 500 мингтага етишини тахмин қилган.
“Вазият жиддий. Ҳозирда аҳоли орасида вирус тарқалиши назоратдан чиқиб кетган” дейди Сяриф. Шунингдек, Сяриф мамлакатдаги кунлик касалланиш ҳолатлари расмий рақамлардан анча юқори бўлиши мумкинлигини қўшимча қилган.
Пойтахт Жакартада якшанба куни вирус юқтириб олиш бўйича рекорд ўрнатилиб, 1000 тадан кўпроқ одамга CОVID-19 ташхиси қўйилди. Шаҳар ҳокимияти бу ҳолатни август ойининг ўрталарида мустақиллик байрамини нишонлаш чоғида аҳолининг кўчадаги ҳаракати кўпайгани билан изоҳлаган.
Uzbek