Белоруссия президенти Александр Лукашенконинг мухолифи Светлана Тихановская 9 сентябрь чоршанба куни Польшада қилган нутқида айтишича, агар Белорус ҳукумати ўзининг айни пайтда давом этаётган ички муаммоларини ҳал қила олмаса, бу келишмовчилкни бартараф этиш учун чет мамлакатларидан воситачилик қилишлари сўралиши мумкин.
Белоруссияда 9 август куни бўлиб ўтган президентлик сайловларида узоқ йиллардан бери тахтдан тушмаётган Александр Лукашенко ғалаба қозонганидан буён намойишлар давом этмоқда. Лукашенконинг мухолифлари ушбу сайловларда ғирромлик қилинганини таъкидлашмоқда.
Аввалроқ, амалдаги ҳукумат мухолифлари ҳам, Европа Иттифоқи ҳам мазкур инқироз Белоруссиянинг ички ишилигини, шунинг учун бу масалани ҳал қилишни белорусларнинг ўзларига қўйиб бериш кераклигини таъкидлашганди.
“Биз бу масалани ўзимиз еча олмаган тақдиримизда, балки, келажакда чет мамлакатлардан воситачилик қилишни сўрашимиз мумкин” деди Тихановская Карпач шаҳрида ўтказилган иқтисодий форумда. Унинг қўшимча қилишича, агар Белоруссия раҳбарлари куч ишлатишда чегарадан ўтишса, ҳукумат оппозицияси Европа Иттифоқидан ёрдам сўраши мумкин.
БМТнинг инсон ҳуқуқларини ҳимоя қилиш бўйича экспертлари Белоруссиядаги намойишларда қатнашган одамларнинг полиция томонидан калтаклангани ва уларга нотўғри муносабатда бўлингани ҳақида юзлаб хабарлар олганларини маълум қилишган.
Аммо, Тихановская намойишчиларга тинчликни сақлаш кераклигини айтган. Шунингдек, Тихановская Белоруссия Россиядан юз ўгира олмаслигини,шунинг учун бу мамлакат билан яхши алоқаларни сақлаб қолиш зарурлигини таъкидлаган.
Uzbek