Оксфорд университети ва AstraZeneca компанияси томонидан ишлаб чиқилган вакцина коронавируснинг Британияда кенг тарқалаётган янги штаммига қарши самарали кураша олади, аммо, у CОVID-19 нинг Жанубий Африкада вужудга келган турининг олдини олишда унчалик фойда бермайди. Бу ҳақда янги тадқиқот натижаларига асосланиб мазкур компания вакиллари маълум қилишмоқда.
Ўтган йилнинг охирида Британияда коронавируснинг «Кент варианти» деб номланган янги тури юзага чиқиб, унинг юқумлилик даражаси 70 фоизга юқорироқ экани аниқланди. Ушбу янги штамм Британияда коронавирусга чалинганларнинг сони кескин ошишига олиб келди. Англияда олиб борилган охирги илмий изланишларга кўра, AstraZeneca компанияси вакцинаси «Кент варианти»га қарши самарали курашади.
Буюк Британиядаги дори-дармон воситалари тартибга солувчи ташкилот бош директори доктор Жейн Рейннинг айтишича, AstraZeneca компанияси вакцинаси янги штаммнинг тарқалишини камайтира оладиган белгиларни кўрсатди ва ушбу натижалар «жуда ишончли». Шунингдек, ушбу вакцинанинг фойдали жиҳатлари унинг кичик камчиликларини ёпиб кетади.
«Юзага келиши мумкин бўлган ножўя таъсирларнинг катта қисми фақат енгил, масалан, қўл оғриғи, енгил бош оғриғи, титроқ ёки иситма бўлиши мумкин. Ушбу вакцинани қабул қилганларнинг ҳар 1000 тадан учтасидагина шундай акс таъсирлар кузатилиши мумкин» дейилади тадқиқот натижалари берилган хабарда.
Аммо, AstraZeneca тадқиқотларига раҳбарлик қилаётган Мене Пангалоснинг сўзларига кўра, мазкур вакцина Жанубий Африкада пайдо бўлган коронавирусниг янги турининг енгил ва ўртача аломатларининг олдини олишда унчалик самара бермаслиги мумкин.
Uzbek