Россия ҳайвонлар учун CОVID-19 га қарши вакцинани рўйхатдан ўтказди, дея хабар берди чоршанба куни қишлоқ хўжалигини назорат қилувчи Росселхознадзор. Бу ҳайвонларни коронавирусдан ҳимоя қиладиган дунёдаги илк вакцина ҳисобланади.
Бугунги кунда Россияда одамлар учун учта коронавирус вакцинаси мавжуд бўлиб, улардан энг таниқлиси Sputnik V ҳисобланади. Шунингек, Москва мамлакатда яратилган EpiVacCorona ва CoviVacдан ҳам фавқулодда ҳолатларда фойдаланишга рухсат берган. Ҳайвонлар учун ишлаб чиқилган вакцина эса Carnivac-Cov деб номланди.
«Carnivac-Covнинг клиник синовлари ўтган йил октябр ойида бошланган бўлиб, унда итлар, мушуклар, тулкилар ва бошқа ҳайвонлар иштирок этди. Мазкур синовларнинг натижалари вакцинанинг зарарсиз ва вирусдан юқори даражада ҳимоя қилишини кўрсатди. Чунки эмланган ҳайвонларнинг ҳаммасида коронавирусга қарши антитаналар ҳосил бўлди» деди Росселхознадзор бошлиғининг ўринбосари Константин Савенков.
Шунингдек, Росселхознадзорга кўра, Carnivac-Covни олган ҳайвонда олти ойгача коронавирусга қарши иммунитет сақланиб қолади. Ушбу вакцинани кенг миқёсда ишлаб чиқариш апрел ойидаёқ бошланиши мумкин.
Uzbek