113 ёшини нишонлагандан бир неча ҳафта ўтиб Мария Бранясда коронавирус аломатлари сезила бошлади. Ҳозирда у тўлиқ соғайган ва CОVID-19дан шифо топган дунёдаги энг кекса инсон ҳидобланади.
Испаниянинг энг кекса одами бўлган Браняс вирусдан омон қолганлиги ҳақидаги хабарлар ўтган ҳафтада дунё бўйлаб шов-шувларга сабаб бўлди. Бу хабар дунёда коронавирусдан энг кўп азият чекаётган мамлакатларидан бири бўлган Испания аҳолисига ҳам яхши кайфият бағишлади. Ҳозиргача коронавирус Испанияда 27 500 дан ортиқ одамнинг ҳаётига зомин бўлди.
1918 йилги вирус ҳамда иккита жаҳон урушига гувоҳ бўлган Браняc коронавирус сабаб бир неча кун курашди холос. Аммо, Браняcни пандемиянинг ўзидан кўра у сабаб юзага келган вазият кўпқроқ хавотирга солди. Бу-жамиятда кекса ёшдагиларга бўлган эътиборнинг жуда камайиб кетганидир.
«Ушбу пандемия туфайли кекса одамлар жамиятимизнинг унутилган шахслари эканлиги ошкор бўлди. Улар бутун ҳаётлари, вақтлари ва орзуларини бугунги ҳаёт учун қурбон қилдилар. Кексалар бу дунёни ҳеч ким эътибор бермайдиган тарзда тарк этишга муносиб эмаслар” деди у ўзининг «Observer» нашрига берган интервюсида.
Қарийб йигирма йилдан бери қариялар уйида яшаб келаётган Браняc жамиятда кексаларга кам эътибор қаратилётгани муаммосига баъзи ечимларни таклиф қилди.
«Бизда қариялар уйида яшаётганлар гўё жамиятдан ғойиб бўлгандек бўлади. Ҳукумат қариялар уйига эътибор ва молиявий ёрдам бериши, бу ерни малакали ходимлар билан таъминлаши керак.Ва энг асосийси, ҳукумат қариялар уйларига кўпроқ тиббий ёрдам кўрсатиши керак» дейди у.
Испаниядаги қариялар уйида пандемиядан олдин ҳам кексалар ҳаммомга бориш ёки сув ичиш учун ҳам бир неча соат кутишларига тўғри келган. Баъзи қариялар уйида суварак ва чумоли босгани каби муаммолар пайдо бўлган. Ҳатто, бундай уйларнинг бирида совун ва таглик каби зарур нарсалар тақчиллиги сабаб кексалар уларни чекланган миқдорда олишган.
Коронавирусдан тузалган 113 ёшли Браняcдан энди нима қилишини сўрашганда у кулиб шундай деди: «Хўш, мен яшайман. Худо хоҳлагунча.»
Uzbek