Исроил Бош Вазири Бинямин Нетаняхунинг 9 декабрь куни маълум қилишича, мамлакатда коронавирусга қарши эмлаш жараёнига 27 декабрдан старт берилади. Исроил Pfizer компаниясининг вакцинасидан 8 миллион дозада буюртма берган бўлиб, ушбу миқдордаги вакцинанинг бир қисми чоршанба куни Исроилга олиб келинган. Нетаняхунинг ўзи ушбу вакцинани биринчи бўлиб қабул қилишга ваъда берди. «Бу Исроил учун катта байрам ҳисобланади. Эмлаш жараёни 27 декабрда бошланади. Эртага вакцинанинг яна бир қисми келади ва у бугунги миқдордан кўпроқ бўалди» деди Нетаняху 9 декабрь куни Тел Авив яқинидаги аеропортга келтирилган вакцинага ишора қилиб. Нетаняхунинг айтишича, кунлик эмлашлар сони 60 мингтагача олиб чиқилади.
«Мен ҳар бир Исроил фуқаросининг эмланишини хоҳлайман. Буни амалга ошириш учун ўзим намуна бўлиб, Исроилда биринчи эмланган одам бўлишни илтимос қилдим», дея қўшимча қилди у. АҚШнинг Pfizer компанияси томонидан яратилган ваксина коронавируснинг олдини олишда 90 фоиз натижа берган. Ушбу ваксина сўнгги учинчи босқич синовларида ҳеч қандай акс таъсир кўрсатмаган. Британия 8 декабрдан Pfizer ваксинаси билан аҳолини оммавий эмлашни бошлади.
Исроил Pfizerдан ташқари АҚШнинг бошқа бир компанияси Modernaдан ҳам вакцина сотиб олишга келишган. Moderna компанияси Исроилга 6 миллион дозада вакцина етказиб беришга келишган бўлиб, унинг етказиб берилиши келаси йилнинг март ойидан бошланади. Бу билан Исроил ўзининг 9 миллион аҳолиси учун жами бўлиб 14 миллион дозада ваксинани таъминлайди.
Uzbek