Германия канцлери Ангела Меркель, чоршанба куни Россияга қарши Ғарб санкцияларининг мақсади халқаро ҳуқуқни ҳимоя қилиш эканини айтди ва Москва билан Киев ўртасидаги денгиздаги можарони Россия Президенти Владимир Путин билан G20 саммитида муҳокама қилиш ниятида эканини билдирди. Бу хақда Рейтер хабар бермоқда.
«Биз Россияга қарши санкцияларни қўлламаяпмиз, аксинча, биз Россияга ҳудудий жиҳатдан яқин бўлса ҳам, мамлакатлар ўзларини ривожлантириш ҳуқуқига эга эканлигини тушунтириш бериш учун санкциялар киритмоқдамиз. Бу халқаро ҳуқуқ меъёрлари.»- деди Меркель хоним Берлинда ўтказилган конференцияда.
Якшанба куни Украина денгиз кучларининг учта кемаси Керч бўғозидан, Азов денгизидаги Украинанинг портларига ўтаётиб, Россиянинг чегара хизмати томонидан қўлга олинди. Россия Украина кемаларини ўз ҳудудий сувларига ноқонуний кириб келган, деб даъво қилмоқда. Украина айбловларни кескин рад этмоқда.
Европа Иттифоқининг юқори лавозимли сиёсатчилари Москва билан Киев ўртасидаги муносабатларда янги кескинлик пайдо бўлишига қарамай, Россияга қарши санкцияларни кучайтиришга чақирди, бироқ дипломатик манбаларнинг фикрига кўра, блокдаги фикрлар иккига бўлинган ва шошма-шошарлик чоралари кўрилмайди.
Uzbek