17 август душанба куни Белоруссия раҳбари Александр Лукашенко конституцияга ўзгартириш бўйича референдум ўтказилганидан кейин ўзининг лавозимини бошқа етакчига топширишга тайёр бўлишини маълум қилди.
Лукашенко бу сўзлари билан мамлакатда бўлиб ўтаётган оммавий намойишлар ва иш ташлашларни тинчлантирмоқчи бўлди.
“Биз сайловларни ўтказиб бўлдик. Мени ўлдирмагунингизча янги сайловлар ўтказилмайди” деди Лукашенко.
Лекин, у конституцияни ўзгартиришни таклиф қилди.
“Биз ўзгаришларни референдум орқали амалга оширамиз ва мен ўзимнинг конституцион ҳуқуқларимни топшираман. Лекин, босим остида ёки кўчадаги намойишлар сабабли эмас, балки қонуний тарзда кетаман. Ҳа, мен авлиё эмасман. Сиз менинг ёмон тарафларимни биласиз. Мен абадий эмасман. Бироқ, агар сиз биринчи президентингизни хор қилсангиз, қўшни мамлакатлар президентлари ва бошқа барча президентларни ҳам пастга урган бўласиз” дея Лукашенконинг сўзларини келтирган Белта ахборот агентлиги.
Ҳозирда Лукашенко ўзининг 26 йиллик раҳбарлик фаолиятидаги энг катта тўсиққа дуч келмқода. Душанба куни омма олдига чиқиш қилган “Саша”ни одамлар “кет” деган сўз билан қарши олишди. Айни пайтда Лукашенкога нафақат ичкаридан босим бўлмоқда, балки Европа Иттифоқи ҳам намойишларни бостиришда аёвсиз ҳаракатлар амалга оширилгани учун Белоруссияга санкциялар жорий қилишни кўриб чиқмода.
Лукашенко Путин билан ушбу можарони муҳокама қилганидан кейин икки давлат ҳамкорлик қилишга келишиб олишди. Путин Белоруссияга ҳарбий жиҳатдан ёрдам беришга тайёрлигини айтган. Аммо, АҚШ ва Европа Иттифоқи Россияни бу можарога аралашмасликка чақирди. Қўшма Штатлар Белоруссиядаги ҳозирги ҳолатни “даҳшатли вазият” деб атаган.
Россия Белоруссиядаги вазиятни яқиндан кузатиб боришининг сабаби шуки, Россия энергиясини Ғарб давлатларига етказиб берувчи қувурлар Белоруссиядан ўтган. Шунингдек, Россия Белоруссияни НАТОдан тўсиб турувчи ҳудуд сифатида кўради. Путин ва Лукашенко шу ҳафтада икки марта мулоқот қилишган.
Uzbek