19 март куни дунёдаги энг кўп мусулмонлар яшайдиган Индонезияда AstraZeneca компанияси вакцинаси исломий шариат қоидаларига зид эканини айтилганди. 21 март куни AstraZeneca компанияси бунга раддия бериб, ўзининг коронавирусга қарши ишлаб чиққан вакцинасида чўчқадан олинадиган ҳеч қандай таркибий қисм йўқлигини маълум қилди.
Жума куни Индонезия Уламолар Кенгаши ўз веб-сайтида AstraZeneca вакцинаси ҳаром эканлиги, чунки уни ишлаб чиқариш жараёнида чўчқанинг ошқозон ости безидан олинадиган трипсин ферменти ишлатилишини айтди. Аммо, Уламолар Кенгаши ҳозирги фавқулодда вазият сабабли ушбу вакцинадан фойдаланиш мумкинлигини маълум қилган.
AstraZenecaнинг Индонезиядаги матбуот котиби Ризман Абудайри ўз баёнотида шундай деди:
«Ушбу вакцинани ишлаб чиқариш жараёнининг барча босқичларида чўчқа гўштидан олинадиган маҳсулотлар ёки бошқа ҳайвон маҳсулотлари ишлатилмайди.»
Индонезияда 19 март куни AstraZeneca вакцинасидан фойдаланишга рухсат берилганди. Айни вақтда Индонезия Осиёдаги коронавирус энг кўп тарқалган мамлакатлардан бири бўлиб, бу ерда ҳозиргача 1 455 788 киши CОVID-19 га чалинган ва уларнинг 39 447 нафари вафот этган.
Uzbek