АҚШда кибер фирибгарликда гумон қилиниб ҳибсга олинган россиялик Егор Крючков Невада штатидаги Tesla компаниясига тегишли «Гигафабрика 1» га ҳужум уюштиришга тайёрлангани ҳақида унинг асосчиси Илон Маск Твиттер-да тасдиқлади.
«Жуда мамнунман. Бу жиддий ҳужум эди», деб ёзган Маск, Teslarati нашридаги мақолани шархлар экан, Крючков компаниянинг тизимига кириш учун рус тилида гаплашадиган Tesla ходимига пора бермоқчи бўлганини айтди.
Аввалроқ АҚШ Адлия вазирлиги 27 ёшли Россия фуқароси Егор Крючков кибержиноятни амалга ошириш учун пора беришга уринишда айбланиб, Лос-Анжелесда ҳибсга олингани ҳақида хабар берган эди.
Агентликнинг хабар беришича, Крючков мамлакатга сайёҳлик визаси билан келган ва тахминан 15 июлдан 22 августгача у Невада штатидаги номи ошкор этилмаётган маҳаллий компания ходими билан тил бириктиришга уринган. Россиялик унга ишчи компьютерларнинг бирига зарарли дастурларни ўрнатиш учун бир миллион доллар пора таклиф қилган. Крючков фирма тизимига киришни истаган ва маълумотни оммага ошкор қилмаслик учун ундан тўлов талаб қилмоқчи бўлган.
Uzbek