Reuters ахборот агентлигининг статистикасига кўра, 19 октябрь душанба кунига келиб дунё миқёсида коронавирусга чалинганларнинг умумий сони 40 миллиондан ошиб кетди. Ҳозирда Ер шарининг шимолий қисмида қиш фаслининг яқинлашиб келиши вирус тарқалишининг авж олишига сабаб бўлмоқда.
Reutersнинг статистикаси давлатлар берган рақамларга асосланган бўлиб, экспертлар бу ҳисоб-китоблар касалланганлар ва ўлганларнинг асл сонидан анча пастлигини таъкидлашмоқда. Чунки, баъзи мамлакатларда коронавирусни текшириш қамрови етарли бўлмаса, яна бир қанча давлатлар статистикани атайин камайтириб кўрсатмоқда.
Статистикага эътибор берадиган бўлсак, дунё миқёсида CОVID-19нинг тарқалиши тезлашгандан тезлашмоқда. Коронавирус илк бор Хитойнинг Ухан шаҳрида январь ойининг бошида қайд этилган. Шундан кейин касалланганлар сони 10 миллионга етиши учун уч ой вақт кетди. Беморлар 10 миллиондан 20 миллион нафарга етиши учун 44 кун, 20 миллиондан 30 миллионга ўсиши учун 38 кун ўтган. Касаллар сони 30 миллиондан 40 миллионга боришига эса атиги 32 кун кифоя қилди.
Шунингдек, ўтган ҳафтада жаҳон бўйича кунлик рекорд янгиланиб, бир сутка ичида 400 мингдан ортиқ янги касалланиш ҳолати қайд этилган. Айни пайтда коронавирусдан энг кўп зарар кўраётган мамлакатлар АҚШ, Бразилия ва Ҳиндистон бўлиб турибди. Қўшма Штатларда ҳар ўн минг одамга 247 нафар бемор тўғри келаётган бўлса, Бразилияда бу кўрсаткич 248 кишини, Ҳиндистонда 55 кишини ташкил қилмоқда.
Ҳозиргача дунёда CОVID-19 дан вафот этганларнинг умумий сони 1.1 миллионтадан ошган. ЖССТ расмийларидан бирининг айтишича, коронавирусга қарши муваффақиятли вакцина ишлаб чиқилиб,у кенг миқёсда фойдаланишга топширилгунча қурбонлар сони 2 миллион нафарга етиши мумкин.
Uzbek