Айрим ҳукуматлар ва гуруҳлар томонидан бўлаётган айбловларга қарамасдан Исроил тажовузкор кибер қуролларни экспорт қилиш қоидаларини енгиллаштирмоқда.
Режага кўра, энди компаниялар баъзи бир маҳсулотларни маълум мамлакатларга сотиш учун маркетинг лицензиясидан озод қилиниши мумкин, дея хабар бермоқда «Reuters» агентлиги. Исроил бошқа йирик мудофаа экспортчилари сингари, қурол савдоси ва унинг экспорт қоидалари ҳақида батафсил маълумотни оммага ошкор этмайди, аммо Мудофаа вазирлиги ушбу ўзгаришни бир йил олдин «Reuters»нинг саволларига жавобан кучга кирганини тасдиқлади.
Соҳа мутахассисларининг таъкидлашича, бу ўзгартириш электрон қурилмаларга кириш ва онлайн алоқаларни кузатиш учун ишлатиладиган кибер қуролларни ёки жосуслик дастурларини сотиш учун тасдиқлаш жараёнини тезлаштиради.
Исроил Мудофаа вазирлигининг таъкидлашича, бу ўзгариш «экспорт назоратида халқаро стандартларини сақлаш ва ҳимоя қилиш билан бирга, Исроил саноатига самарали хизмат кўрсатишни осонлаштириш учун қилинган». Исроил ҳукумати ва компаниялар қўшни давлатлар жосусларга қарши дастурларнинг харидорлари қаторига қўшилиш ҳақида изоҳ беришдан бош тортдилар.
Ҳукумат кўпроқ ўзгаришлар киритиши мумкинлигига ишора қилиб, иқтисодий ўсиш ва экспортни рағбатлантириш учун масъул бўлган Иқтисодиёт вазирлиги кибер технологияларнинг ҳужумларига қарши ҳамда мудофаа қобилиятига эга бўлган экспортни амалга ошириш учун махсус бўлинма ташкил қилмоқда.
«Бу ислоҳотнинг муҳим қисмидир. Иқтисодиёт вазирлигига ушбу муҳим масала учун кўпроқ маблағ ажратилиши кўзда тутилмоқда», деди вазирлик вакили.
Uzbek