Буюк Британиянинг етакчи олимлардан бири Питер Опеншоунинг айтишича, келажакда коронавирус касаллигининг олдини олишда вакциналар эмас, балки, бурун спрейлари яхши самара бериши мумкин.
Лондондаги Қироллик коллежи профессори Опеншоу вирусга қарши курашда бурун спрейларидан фойдаланишни «ақлли» йўл деб атамоқда. Ҳозирда коронавирусга қарши кураш ишларига катта куч сарф қилинмоқда ва унда асосий эътибор вакцина яратишга қаратилмоқда.
Аммо, шу пайтгача ишлаб чиқилган вакциналар яқин келажакда самарасиз бўлиб қолиши мумкин. Чунки, дунёда вируснинг янги вариантлари юзага келмоқда. Бунга Бразилияда, Британияда ва Жанубий Африкада аниқланган янги мутацияларни мисол қилиб келтириш мумкин. Шунинг учун коронавирусни буруннинг ўзида зарарсизлантирувчи спрейлар вакциналардан анча самарали бўлиши кутилмоқда.
«Биз, албатта, бурун спрейларини ишлаб чиқишимиз ва бурун шиллиқ қаватида вирусга қарши иммунитет ҳосил қилишимиз керак. Ҳозир бизга тақдим қилинаётган вакциналар организмда антитаналар ҳосил қилади ва бизни вирусдан ҳимоя қилади. Аммо, бурун спрейларини яратиш келажакда жуда яхши усулга айланиши мумкин» дейди Опеншоу.
Uzbek