26 сентябрь куни Австралия Бош Вазири Скот Моррисон БМТнинг 75 ассамблеясида чиқиш қилиб, дунёдаги мамлакатлар CОVID-19 нинг қандай келиб чиққанини аниқлаш учун қўлларидан келган барча ишни амалга оширишлари кераклигини таъкидлади.
Моррисоннинг айтишича, ҳозирги пандемиянинг манбасини аниқлаш келажакда юз бериши мумкин бўлган бошқа глобал пандемиянинг хавфини камайтириши мумкин.
“Коронавирус бизнинг дунёйимиз ва ундаги одамларга фалокат олиб келди. Биз вируснинг қандай келиб чиққанини аниқлаш учун қўлимиздан келган барча ишни қилишимиз шарт. Бунинг ягона мақсади мазкур ҳолат яна такрорланишининг олдини олишдир” дейди Моррисон видеоконференция тарзида бўлиб ўтаётган БМТ Бош ассамблеясида.
Австралия Бош Вазири Скот Моррисон шу йилнинг бошида ҳам коронавируснинг манбасини аниқлаш учун Хитойда текширувлар олиб бориш кераклигини талаб қилганди. Бу ҳолат Хитой ва Австралия ўртасидаги муносабатларни ёмонлаштирди. Хитой ҳукумати Австралиянинг бу талабларига қатъий рад жавобини берди. Шунингдек, Хитойнинг Австралиядаги элчиси бундай талаб икки мамлакат ўртасидаги савдо алоқаларининг бузилишига олиб келиши мумкинлиги ҳақида огоҳлантирган.
Ўшандан бери Хитой Австралияга нисбатан савдо санкцияларини жорий қилиб келмоқда. Унга кўра, Пекин Австралиядан мол гўштини импорт қилишни тўхтатди, 308.5 миллион АҚШ доллари миқдоридаги арпа савдосини бекор қилди ва Австралиядан келтириладиган бошқа маҳсулотларга 80.5 фоизли бож жорий қилди.