11 апрел куни АҚШ давлат котиби Антони Блинкен Украина ва Россия чегарасида юзага келаётган жиддий вазият ҳақида гапириб, агар Россия Украинага нисбатан «тажовузкор» ҳаракат қилса, бу руслар учун ёмон «оқибатлар” билан тугаши ҳақида огоҳлантириш берди. Ҳозирда Украина чегарасида рус қўшинлари тўпланмоқда ва бу хавотирларни кучайтирмоқда.
«Сизга шуни айтишим керакки, Россиянинг Украина чегараларидаги ҳаракатларидан жиддий ташвишланяпман. Шунинг учун биз Европадаги иттифоқчиларимиз билан яқин алоқада турибмиз. Барчамиз бу ҳолатдан ташвишга тушмоқдамиз” дейди Блинкен NBC телеканалига берган интервюсида.
«Президент Байден бу борада жуда аниқ гапирди. Агар Россия бепарволик қилса ёки тажовузкорона ҳаракат қилса, бунинг оқибати ёмон бўлади» дея қўшимча қилди Блинкен.
Сўнгги ҳафталарда Украина ва Россия ўртасидаги зиддиятлар яна уйғона бошлади. Украина Россияни шимолий ва шарқий чегараларда ҳамда аннексия қилинган Қрим ярим оролида минглаб ҳарбий хизматчиларни тўплашда айбламоқда. Қўшинларни тўплаётганини инкор қилмаган Россия 11 апрел куни ушбу ҳаракатлар билан Украина билан уришишни ният қилмаётганини, шу билан бирга, зиддиятлар юзага келган ҳудуддаги русийзабон одамларнинг тақдирига ҳам бефарқ қарамаслигини таъкидлади.
Россия Украинага тегишли бўлган Қримни 2014 йилда аннексия қилган ва ушбу урушда 13 мингдан зиёд одам ҳалок бўлганди. Аммо, БМТ ушбу ҳудуд ҳамон Украинага қарашлилигини таъкидлайди. Украина ҳам бир кун келиб Қримни руслардан қайтариб олишини даъво қилади.
Uzbek