Ироқ ва Суриядан ташқарида ИШИД таҳдиди ҳақида хавотир кучайиб бормоқда. Бу террорчи ташкилотга қарши курашаётган коалиция ғарбий Африка ва Саҳел минтақасига эътибор қаратиши керак, деди пайшанба куни АҚШ давлат котиби Майк Помпео.
«Коалиция аъзолари ҳибсдаги минглаб чет эллик террорчи жангариларни қайтариб олишлари ва улар содир этган ваҳшийликлар учун жавобгарликни ўз зиммаларига олишлари керак», деди Помпео ИШИДни енгиш учун тузилган коалиция ташқи ишлар вазирларининг Вашингтондаги учрашувида.
ИШИД Ироқ ва Суриядаги деярли барча ҳудудни йўқотди. Собиқ раҳбар Абу Бакр ал-Бағдодий ўтган ой АҚШ томонидан ўлдирилган. Аммо жангари гуруҳ Сурияда ва ундан ташқарида хавфсизликка таҳдид бўлиб қолмоқда.
Маълумот учун, ҳибсга олинган 10 мингга яқин ИШИД жангарилари ва уларнинг кўплаб оила аъзолари Суриянинг шимолий-шарқидаги курдлар томонидан қўриқланадиган қамоқхоналарда қолмоқда. Вашингтон Европа давлатларини бу ердаги ўз фуқароларини қайтариб олишга ундамоқда, аммо ҳозирга қадар улар буни рад этишган.
Uzbek