Ўтган ҳафтанинг жума кунида Эронда бензин нархи камида 50 фоизгача оширилиши эълон қилинди. Бунга норози бўлган халқ ҳукуматга қарши намойишлар уюштирди. Amnesty International ташкилотининг хабар беришича, Эроннинг 21 та шаҳрида бўлган бу намойишларда ҳукумат томонидан 100 дан ортиқ одам ўлдирилган. «Ташкилот ҳақиқий қурбонлар сони янада кўпроқ бўлиши мумкин, деб ҳисоблайди. Баъзи маълумотларга кўра 200 киши ҳалок бўлган», дейилади унинг баёнотида.
Снайперчилар намойишчиларни томдан туриб ва битта ҳолатда вертолётдан ўққа тутдилар. Разведка ва хавфсизлик кучлари жасадларни ўз оилаларига қайтариб бермаган.
Эрон суд маҳкамаси вакили Ғуломҳуссайн Исмаили мамлакатда тинчлик ўрнатилганини айтди. Бироқ ижтимоий тармоқларда тарқатилган видеолар душанба оқшомида ҳам бир нечта шаҳарларда норозилик намойишлари давом этгани ва кўчаларда хавфсизлик кучлари зўравонлик қилаётганидан далолат бермоқда. Расмийлар берган маълумотларга кўра, 1000 га яқин намойишчи ҳибсга олинган.
Uzbek