Душанба куни Эрон президенти Ҳасан Руҳоний коронавирус инқирози юз бераётган ҳозирги пайтда Америка президентининг Эронга ўтказаётган босими «инсонийликка зид» эканлигини айтди.
Ҳозирда Эрон Яқин Шарқдаги вирус энг кўп тарқалган давлат бўлиб турибди. Эрон расмийларининг айтишича, АҚШ санкциялари мамлакатнинг эпидемияга қарши курашини янада қийинлаштирмоқда.
АҚШ президенти Дональд Трамп 2015 йилда имзоланган кўп томонлама ядровий битимдан чиққан ва шундан кейин 2018 йилда Эронга нисбатан иқтисодий санкцияларни қайта жорий қилганди.
«Ҳозирги қийин даврда Америка Қўшма Штатларининг Эрон халқига қилаётган босими ҳар қачонгидан ҳам ғайриинсонийдир. Бу санкцияларнинг давом этиши барча инсоний тамойилларга ва халқаро қоидаларга зид бўлган даҳшатли жиноятдир», деди Руҳоний Италия Бош вазири Жузеппе Конте билан телефон орқали суҳбат чоғида.
Трампнинг таъкидлашича, 2015 йилги ядро битими Эроннинг ядровий қурол ишлаб чиқишининг олдини олиш учун етарлича кучга эмас. АҚШ президенти Эрон ўзининг ядровий дастурига нисбатан кескин чекловларни қабул қилиши, баллистик ракета лойиҳасини ва Яқин Шарқдаги шерикларини қўллаб-қувватлашни тўхтатиши учун бу давлатга «максимал босим» қўлламоқчи. Эрон эса Вашингтон санкцияларни олиб ташламагунча музокаралар олиб бормаслигини айтмоқда.
Uzbek