davletovuz телеграм канали муаллифи Олий Мажлис Қонунчилик палатасида жамоавий экскурсиялар ташкил қилиниши юзасидан шахсий фикр мулоҳазаларини билдириб ўтди. Жумладан, қуйидагилар хақида маълум қилмоқда.
Ўзбекистон Республикаси Олий Мажлиси Қонунчилик палатасининг Регламентига янги қўшимча киритилди.
Депутат Расулбек Кушербаевнинг айтишича, янги нормага кўра корхона, ташкилот ва муассасаларнинг ёзма мурожаатлари асосида Қонунчилик палатасида жамоавий экскурсиялар ташкил қилиниши мумкин.
Қонунчилик палатаси мажлисларини ўтказиш тартиби билан таништириш учун ташриф буюрувчилар унинг очиқ мажлисларида ҳам иштирок этишлари мумкин.
Фақат ташриф буюрувчилар Қонунчилик палатаси фаолиятига аралашиш ҳуқуқига эга эмас, улар унинг ишини маъқуллаш ёки маъқулламасликдан сақланишлари, ўрнатилган тартибга риоя этиши шарт.
P.S.: Демак, ҳозирча фуқароларнинг олдиндан билдиришнома орқали, парламент сайти орқали рўйхатдан ўтиш амалиёти йўқ. (XXI аср, ҳар ҳолда). Парламент музеймидики одамлар зални томоша қилса. Қолаверса, 25 йиллик бинода тарихий-маданий қиймат ҳам йўқ (катта қандилни айтмаса, албатта). Давлатлар ўртасида чегаралар очилаяпти, лекин парламентимизга кириш учун ҳалиям «виза» керак.
Иккинчидан, албатта, ташкилот ёки корхона хат ёзиши керак дегани «биз фуқарога ишонмаймиз, масъулият, ўртоқ раис/директор/бошлиқ, сизда бўлади» дегани.
Учинчидан, халқ вакилларининг фаолияти очиқликда ҳалиям энг паст ўринда. Буларнинг бошчилигида тағин давлат ҳокимияти ва бошқаруви органлари очиқлиги индекси тузилади. Аввал ўзидан бошлаш керак, бизнингча. Қолаверса, бир-икки депутатни айтмаса, парламент вакиллари ҳалигача «медиа-персона» эмас.
Хулоса шуки, одамлар бошида, депутатларга «ғалва» бўлади. Кимдир бақирворади, кимдир ҳаяжонланади. Лекин шунақа тарбияланамиз, маданий жамият қурамиз. Бунинг учун, аввало, ўз фуқароларимиздан қўрқмаслигимиз керак.
Албатта, буларнинг барчаси ИМҲО.
Uzbek