Хитой ҳукумати Жаҳон Соғлиқни Сақлаш Ташкилотининг (ЖССТ)экспертлари коронавирусни текширишига розилик берди, дея хабар беради БМТ 28 январь куни.
Халқаро мутахассислар вирус ҳақида кўпроқ маълумот тўплаш ва унинг тарқалишига қарши чоралар кўриш учун имкон қадар тезроқ Хитойга келишади.
ЖССТ бош директори Тедрос Адҳаном Габрейрис Хитойга икки кунлик ташриф билан келган ва мамлакат раҳбари Си Цзин Пин ва бошқа вазирлар билан учрашган.
«Муҳокамаларда Ухандаги вазият, бошқа шаҳар ва вилоятлардаги соғлиқни сақлаш тадбирлари, вируснинг жиддийлиги ва тарқалиши бўйича қўшимча тадқиқотлар ўтказиш, маълумотлар алмашишни давом эттириш ва Хитойнинг ЖССТ билан биологик маълумотларни ўзаро таҳлил қилиш бўйича давомли ҳамкорлик масалалари муҳокама қилинди» дейилади ЖССТ томони. Аммо, халқаро экспертларнинг айнан қачон Хитойга келиши маълум қилинмаган.
Сешанба куни Си Цзин Пин, Хитой «шайтоний» коронавирусни йўқ қилишига амин эканлигини айтди. Вирус ҳозиргача 106 кишининг ҳаётига зомин бўлди ва дунёнинг бир неча мамлакатига тарқалди.
Uzbek