4 январь куни Туркиянинг Истанбул шаҳрида юзлаб одамлар намойишга чиқишди. Намойишчилар Туркиянинг етакчи университетларидан бирига президент Ражаб Таййип Эрдўған томонидан тайинланган ректорнинг ишдан олинишини талаб қилишди.
Авваллари Туркияда университет раҳбарлари сайловлар орқали аниқланарди. Аммо, 2016 йилда амалга ошмай қолган давлат тўнтаришидан кейин университет раҳбарларини президент тайинлаши белгилаб қўйилди.
1 январда Эрдўған Мелиҳ Булуни Боғазичи университети ректори этиб тайинлади. Бу эса кўплаб одамларнинг, жумладан, ушбу университет талабаларининг норозилигига сабаб бўлди. Уларнинг даъволарига кўра, Мелиҳ Булунинг ушбу университет раҳбарига айланишида сиёсий таъсир бор.
Намойишчиларнинг баъзилари “Биз тайинланган ректорни хоҳламаймиз. Мелиҳ, истеъфога чиқ” дея бақиришган бўлса, бошқалари “Биз ҳуқуқларимизни истаймиз. Мелиҳ Булу Боғазичига ректор бўлолмайди” деб даъво қилишди.
Туркияда бундай ҳолат биринчи марта содир бўлаётгани йўқ. 2016 йилда Меҳмет Ўзкан Эрдўған томонидан айнан шу университетга тайинланганида ҳам зиддиятлар юзага келган. Ўшанда ҳам университет талабалари ва академиклари бундан норози эканликларини билдиришган.
“Академия мафкура ва сиёсатдан устундир. Аммо, университет аъзоларининг иродасига қарши чиқиб, унга ректор тайинлаш сиёсий ҳаракатдир» дейди намойишчилардан бири Селен.
Боғазичида электротехника бўйича ўқийдиган 22 ёшли Эртуғрул Устанинг айтишича, талабалар ҳозирги ректор ўрнига бошқа шахс сайланишини хоҳлашади.
“Улар 2016 йилда бизга ректор тайинлашди. Биз бунга ҳам қарши эдик. Бу ҳолат иккинчи марта содир бўлди, шунинг учун биз янада кучлироқ қаршилик кўрсатишимиз керак. Шунинг учун биз бу ерга йиғилдик” дейди Уста АFP ахборот агентлигига.
Боғазичи университети 1863 йилда ташкил этилган бўлиб,у дастлаб Роберт коллежи номи билан танилган. Ушбу таълим муассасаси АҚШ ҳудудидан ташқарида ташкил этилган биринчи Америка университети ҳисобланади. Университет 1971 йилда Туркияга топширилгач, унинг номи туркчага ўзгартирилди.
Uzbek