Англиянинг Манчестер университети олимлари томонидан олиб борилган тадқиқотларга кўра, коронавирусдан тузалган бир қанча беморлар касалхонадан чиққанларидан саккиз ҳафта ўтгач уларнинг эшитиш қобилиятлари ёмонлашган. Бу эса CОVID-19 га чалинган ва ундан тузалган беморларнинг соғликларида анча вақт ўтгандан кейин ҳам муаммолар давом этишини кўрсатмоқда.
Манчестер университетининг тадқиқот маркази олимлари ушбу илмий изланишлар давомида коронавирусдан тузалган 121 нафар кишини ўрганишди. Беморлар касалхонадан чиққанларида бошлаб саккиз ҳафта мобайнида шифокорлар билан телефон орқали суҳбатда бўлдилар. Улардан эшитишдаги ўзгаришлар ҳақида сўралганда вирусга чалинишдан олдин ҳам қулоғида муаммоси бўлган беморларнинг 16 таси (тадқиқотда қатнашганларнинг 13.2 фоизи) ўзида бу қобилият янада ёмонлашганини айтган. Шунингдек, CОVID-19 бошидан кечиришдан олдин эшитиши яхши бўлган 8 кишида муаммолар пайдо бўлган бўлса, яна 8 кишининг қулоғида доимий шанғиллаш юзага келган.
“Бизга олдиндан маълумки, тепки, қизамиқ ва менингит каби вируслар эшитиш қобилиятининг йўқолишига сабаб бўлаши мумкин. Коронавирус ҳам қулоқлар ва мия ўртасида ахборотни ташувчи асаб толаларига зарар етказади. CОVID-19 эшитиш тизимига муаммолар туғдириши, жумладан ўрта қулоқ ёки ички қулоққа зарар етказиши эҳтимоли бор” дейди ушбу тадқиқотда қатнашганлардан бири профессор Кевин Мунро.
Манчестер университети олимлари ўзларининг илмий ишлари баёнотида коронавируснинг эшитиш билан боғлиқ муаммоларга олиб келиши мумкинлигининг сабабларини аниқлаш учун яна бир қанча тадқиқотлар олиб борилиши кераклигини та’кидлашган.
“Коронавирусдан тузалган одамларнинг эшитиш қобилиятида ушбу касалликдан олдин мавжуд бўлган ва касалликдан кейин юзага келган ўзгаришларни аниқлаган бўлсакда, биз бу борада хулоса қилишда эҳтиёткорликка чақирамиз. CОVID-19 дан бошқа факторлар ҳам эшитишнинг йўқолиши ва қулоқда шанғиллашнинг юзага келишига таъсир қилиши мумкин” дейди Мунро.
Uzbek