Англияда олиб борилган илмий изланишлар натижасига кўра, одамнинг бир пайтнинг ўзида ҳам грипп ҳам коронавирусга чалиниши ўлим хавфини икки бараварга оширади.
Англия оммавий соғлиқни сақлаш ташкилоти томонидан олиб борилган тадқиқотлардан маълум бўлдики, шамоллаш ва СOVID-19 ни юқтириб олганларнинг ўлиш эҳтимоли фақатгина СOVID-19 чалинганлардан 2.27 маротабагача, бу икки касалликка чалинмаганлардан 5.92 маротаба юқорироқ бўлади. Тадқиқотчилар бу борада 65 ёшдан ошганлар энг кўп эканлигини айтишган. Яъни, грипп ва коронавирусга чалинишнинг энг кўпи бу ёш тоифасидагилар орасида аниқланган бўлиб, уларнинг ярмидан кўпи ўлган.
Ушбу тадқиқотда мавсумий грипп билан биргаликда СOVID-19 ни юқтириб олиш инсон ҳаётига “катта хавф” эканини таъкидланган. Англия оммавий соғлиқни сақлаш ташкилотининг тиббий раҳбари Йвонне Дойл шундай дейди:
”Агар сиз бу икки касалликка бирданига чалинсангиз, сиз жиддий хавф остида қоласиз. Бу муаммога дуч келиши мумкин бўлганлар иммум тизими кучсиз одамлардир”.
Ҳозирда Осиёнинг баъзи мамлакатлари гриппга қарши эмлаш дастурини бошлаб юборишди. Лекин, бошқа мамлакатлар, масалан, Полша коронавирус пандемияси туфайли юзага келган етишмовчиликлар сабаб гриппга қарши ваксиналарни сотиб олишда қийинчиликка дуч келмоқда.
Ҳозирги вирус авж олган пайтда кириб келаётган грипп мавсуми ЖССТ томонидан катта хавф деб таърифланган.
“Биз баъзи давлатларда коронавирус бўйича вазиятнинг ёмонлашишни бошлаётганини кўрмоқдамиз. Одамларнинг касалхонага ётқизилишлари, реанимация бўлимларидаги касаллар сони ўсиб бормоқда. Бу хавфли, чунки, биз ҳали грипп мавсумига кириб келмадик” дейди ЖССТнинг СOVID-19 га қарши кураш бўйича раҳбари Мария Ван.
Uzbek