Германиянинг ўнг қанот экстремистлари Россияда Санкт-Петербург яқинидаги лагерда жанговар тайёргарликдан ўтмоқдалар. Бу ҳақда Германиянинг Focus журнали немис разведка хизматларининг маълумотларига асосланиб хабар бермоқда. Нашрга кўра, жангчилар бу ерда қурол ва портловчи моддаларни қандай ишлатишни, шунингдек, қўл жангини ўрганадилар.
Санкт-Петербургдаги маҳаллий ОАВ маълумотларига кўра, «Партизан» гуруҳи 2012 йилда ташкил этилган ва DOSAFF тизимига киради. Партизан жангчилари турли хил ОАВ хабарларига кўра, Сурия ва Украина шарқидаги ҳарбий можароларда қатнашган ҳисобланадилар.
Партизан машғулотларида шунингдек, портлашлар учун Швецияда қамоққа олинган Виктор Мелин ва Антон Тулин иштирок этишган. Марказ фаолиятининг бир қисми Санкт-Петербург шимолидаги «Уделная» метро бекати яқинидаги захира ҳарбий-ватанпарварлик клубида ўтказилади. Қолган машғулотлар учун қатнашчилар Ленинград вилоятига боришлари айтилмоқда.
Focus News ҳафталик журнали хабарига кўра, Санкт Петербургда ҳарбий тайёргарликдан ўтаятган немисларни бир нечта ташкилот билан боғлаш мумкин. Улардан бири Junge Nationalisten бўлиб, бу ўта ўнг экстремистик кайфиятга эга бўлган Германия Миллий Демократик Партияси (НПД) қанотидаги ёшлар ташкилоти ҳисобланади. Мазкур ташкилотнинг аъзолари сони бор-йўғи 280 кишини ташкил этишига қарамай, улар жамоат тадбирларида фаол иштирок этадилар.
Шунингдек, Россиядаги лагерларда ҳарбий тайёргарликдан ўтган деб гумон қилинувчи яна бир тоифа бу «Учинчи йўл» партияси аъзоларидир. Учинчи йўл Германиядаги энг радикал партиялардан бири бўлиб, Махсус хизматлар томонидан тақдим этилган маълумотларга кўра, у Миллий социализмнинг шовинизм-ирқчилик мафкурасига содиқ қолади ва демократик тизимни рад этади. Бу партия дастлаб жамоат ташкилоти сифатида пайдо бўлган, кейинчалик ҳукумат томонидан унинг тақиқланиши эҳтимоли пайдо бўлгач, партия сифатида қайта ташкил этилади. Гап шундаки, Германияда партияни тақиқлаш жамоат ташкилотига қараганда анча қийин.
Шу жойда савол туғилади. Нега Россия? Умуман олганда, сўнгги йилларда Россия бир неча бор Европанинг ўнг қанот радикаллари учун диққат марказига айлангани ҳеч ким учун сир эмас. 2015 йилда Санкт-Петербургда «Халқаро консерватив Россия форуми» бўлиб ўтди, унда НПД ўнг қанот экстремистик партиясининг собиқ раҳбари Удо Воигт иштирок этди. Шунингдек, мазкур тадбирда Италиянинг «Янги куч» ўта ўнг қанот партияси, Грециянинг «Олтин тонг» ва Италиянинг «Лига» партиялари аъзолари қатнашган эдилар. Учинчи йўл партиясининг телеграм каналида Россиянинг ташқи ва ички сиёсий йўналиши ҳақида мақтовли гапларга гувоҳ бўлиш мумкин.
Uzbek