Шимолий Кореяда ҳибсга олинган австралиялик талаба Швеция ҳукумати ёрдами билан озодликка чиқди ва пайшанба куни мамлакатдан чиқиб кетди. Бу хақда Reuters хабар бермоқда.
Шимолий Корея пойтахти Пхеньянгда ўқиган 29 ёшли Алек Сиглей 25 июнда хеч қандай хабарсиз йўқолиб қолган эди.
«Мен яхшиман, ҳаммаси яхши.» дейди Сиглей Пекин аэропортига етиб келган журналистларга.
У Шимолий Корея пойтахти Пхеньянда содир бўлган воқеани изоҳлашдан бош тортди. У аэропортга келганида журналистларга тинчлик (peace) белгисини кўрсатган.
Австралия Бош вазири Моррисон Швеция ҳукумати талабанинг озод этилишига ёрдам берганини айтди.
Бироқ, у Сиглей нима учун ҳибсга олинганини айтмади.
Австралиянинг Шимолий Корея билан дипломатик алоқалари мавжуд эмас ва бундай масалаларда Швеция каби бошқа мамлакатларга суянади.
«Швеция Австралия билан тузилган консуллик хизматларини кўрсатиш ва Австралия ҳукумати билан яқин ҳамкорлик қилиш тўғрисида келишувга мувофиқ ҳаракат қилди», деди Моррисон.
«Биз Алекнинг дахлсиз ва муҳофаза қилинаётганидан жуда хурсандмиз», деди отаси Гари Сиглей.
Uzbek