Аввалроқ Саудия Арабистонининг икки муқаддас шаҳри бўлган Макка ва Мадинада комендантлик соати жорий қилингани хақида хабар қилгандик.
Душанба куни Қиролликнинг Ички ишлар вазирлиги коронавирус тарқалишини камайтириш мақсадида яна бешта шаҳарда комендантлик соати амалга оширилишини маълум қилди. Ушбу қарор соғлиқни сақлаш бўйича масъулларнинг тавсияларига биноан қабул қилинган.
24 соатлик комендантлик соати мамлакат пойтахти Ар-Риёдда ,шунингдек, Табук, Даммам, Даҳрон ва Ал-Ҳуфуф шаҳарларида қўлланилади.
Ушбу ҳудудлар аҳолисига ҳар куни соат 6.00 дан 13.00 гача дори-дармон ва озиқ-овқат каби зарурий эҳтиёжларни қондириш учун уйларини тарк этишга рухсат берилади. Улар ўзларига яқин бўлган дорихона ва дўконларга боришлари керак.
Ички ишлар вазирлиги баёнотида ушбу шаҳарларга кириш ёки чиқиш таъқиқланиши айтилган. Аммо ушбу тақиқлар давлат ва хусусий секторда ишлайдиганларга таъсир қилмайди.
Uzbek