Саудия Арабистони Қироли Салмон мамлакат бўйлаб комендантлик соати қисман енгиллаштирилишини буюрди. Аммо, муқаддас Макка шаҳри ва унга қўшни бўлган бир қанча ҳудудларда 24 соатлик қатъий режим сақланиб қолади.
Саудия Арабистони ҳукумати фармонига кўра, фуқаролар эрталаб соат 9 дан кечки соат 5 гача кўчада ҳаракат қилишлари мумкин. Коментдантлик соатининг енгиллаштирилиши 26 апрелдан 13 майгача амалда бўлади. Мазкур қарор соғлиқни сақлаш органларининг тавсияларига биноан қабул қилинган.
Энди қиролликда улгуржи ва чакана савдо дўконлари, савдо марказлари фаолиятларини олиб боришлари мумкин. Шунингдек, пудратчи компаниялар ва фабрикаларга вақтга қўйилган чекловларсиз ўз фаолиятини давом эттиришга рухсат берилди. Улар соғлиқни сақлаш бўйича қоидаларга қатъий риоя этишлари талаб этилади. Қонунни бузганлар белгиланган тартибда жазоланади.
Сартарошхоналар, спорт ва соғломлаштириш клублари, дам олиш марказлари, кинотеатрлар, гўзаллик салонлари, ресторанлар ва кафеларнинг очилишига ҳозирча рухсат берилмаган.
Саудия Арабистонида ҳозиргача 16 299 киши CОVID-19 билан касалланган бўлиб, уларниннг 136 таси вафот этган. 2144 нафар беморнинг тузалгани ҳақида хабар берилган.
Uzbek