15 июнь куни Россия суди АҚШнинг ҳарбий денгиз флотида хизмат қилган собиқ денгизчи Пол Веланни АҚШга жосуслик қилишда айбдор деб топди ва уни 16 йиллик қамоқ жазосига ҳукм қилди. Ушбу суд жараёни ёпиқ ҳолда ўтказилган бўлиб, АҚШ дипломатлари уни адолатсиз бўлганини таъкидлашган.
АҚШ,Канада,Британия ва Ирландия фуқаролигига эга Велан Россия федерал хавфсизлик хизмати томонидан 2018 йилнинг 28 декабрида Москвадаги меҳмонхонада қўлга олинган ва шундан бери ҳибсда ушланиб турилганди. Россия ҳукуматининг маълум қилишича, 50 ёшли Велан жиноят устида қўлга олинган бўлиб, унинг флешкасида яширин маълумотлар борлиги аниқланган. Велан бу айбловларни рад этган ва ўзини қопқонга туширишганини айтган. У ўзига рус таниши томонидан берилган ушбу флешка ичида таътилда тушилган расмлар бор,деб ўйлаганини таъкидлаган.
АҚШлик элчилар бу ҳолатни ўзи шундоқ ҳам ёмон бўлган Россия билан алоқаларни яхшилашда “катта тўсиқ” бўлишини айтиб,Веланнинг айбдорлигига ҳеч қандай асос йўқлигини ва уни озод этилишини сўрашган.
Судда қатнашган прокурорлар Веланни АҚШ разведкасида капитан эканликда айблашган ва судядан унга 18 йиллик қамоқ жазоси тайинланиши сўрашган.
Uzbek