Қирғизистоннинг собиқ президенти Атамбаев қанча муддатга ҳибсга олинди?

Алмазбек Атамбаевнинг адвокати журналистга унинг мижози коррупцияда расман айбланганини айтди. Адвокат бу айбловни асоссиз деб билади. Бу ҳақида DW агентлиги хабар бермоқда.

Қирғизистоннинг собиқ президенти Алмазбек Атамбаев 26-августгача ҳибсга олинди. Унинг ишидаги тергов тадбирлари давомида у Миллий хавфсизлик давлат қўмитасининг тергов ҳибсхонасига жойлаштирилган. “24.кг” ахборот агентлигининг хабар беришича, бу эҳтиёт чораси 9-август, жума куни кечқурун Бишкекнинг Первомайский туман суди томонидан белгиланган.

Собиқ президентнинг адвокати Сергей Слесаревнинг журналистларга айтишича, унинг мижозига коррупция айблови қўйилган. Слесарев бу айбловни асоссиз деб атади. «Агар менинг мижозим гувоҳ сифатида таклиф қилинган бўлса-ю, аммо сўроқ қилинмаса, уни қандай оқлаш мумкин? Бу дастлабки режалаштирилган сценарий», – дейди адвокат. У Атамбаевни бошқа айбловлар кутиши мумкинми деган саволга жавоб бермади.

Алмазбек Атамбаев 2011-йилдан 2017-йилгача Қирғизистон президенти бўлган. 2019-йил июн охирида парламент уни дахлсизлик ҳуқуқидан маҳрум қилди. 7-август куни ҳуқуқ-тартибот идоралари ходимлари Атамбаевнинг Кой-Тош қишлоғида жойлашган уйига бостириб киришга икки марта уринишган. Тартибсизликлар пайтида 45 га яқин одам жароҳат олди, МХДҚ Алфа махсус кучлари қўмондонининг ўринбосари ўқ еб яраланган ва кейинчалик ҳалок бўлган. Атамбаев тарафдорлари томонидан олтита махсус кучлар зобитлари гаровга олинган.

7-август воқеаларидан кейин Қирғизистон раҳбари Сооронбай Жэнбеков МХДҚ махсус кучларига қуролли қаршилик кўрсатган Атамбаев процессуал мақомини ўзгартиришини айтди. Эндиликда, бир қатор жиноий ишлардаги собиқ гувоҳ оғир жиноятда гумонланувчига айланди.

8-август куни Атамбаевни ҳибсга олиш бўйича махсус операциялар Ички ишлар вазирлигининг махсус бўлинмалари томонидан амалга оширилди. Кой-Тошга 3000 га яқин полициячи ва махсус техника жалб қилинди. Икки соатлик полиция тўқнашувидан сўнг Атамбаев таслим бўлди. Ўша куни кечқурун Бишкек марказида ўз тарафдорларини йиғишга уриниш ҳаракатлари ҳуқуқ-тартибот ходимлари томонидан қаттиқ бостирилди. Намойишчиларга қарши енгил шовқинли гранаталар ва кўздан ёш оқизувчи газ ишлатилган.