8 апрел куни Қирғизистон Ички ишлар вазирлиги биноси олдида юзлаб одамлар тўпланиб намойиш ўтказишди. Ушбу ҳолатга бир неча кун аввал 27 ёшли Ойзода Канатбекова ўғирлаб кетилгани ва унинг мурдаси топилгани сабаб бўлди. Аммо, политция ушбу жиноят учун жавобгарларни ҳалигача топмаган, айнан шунинг учун пайшанба куни намойишлар бўлиб ўтди.
Ойзода Канатбекова 5 апрел куни ўғирлаб кетилганди. Шундан икки кун ўтиб чекка ҳудудда машинада Канатбекованинг жасади топилган. У бўғиб ўлдирилган бўлиб, уни ўлдирган гумондор шахс ҳам пичоқ билан ўзини ҳалок қилган.
Одамларнинг ғазабига сабаб бўлаётган нарса шуки, Канатбекованинг ўғирланиши камера тасвирига тушиб қолгани ва ушбу ишни амалга оширишда фойдаланилган машина рақамлари ҳам мазкур тасвирларда аниқ кўриниб турганига қарамай полиция халигача гумонланувчини топа олмади.
Намойишчилар ички ишлар вазирлигидаги юқори лавозимли ходимларнинг истеъфосини талаб қилишган. Хусусан, улар ички ишлар вазири ва Бишкек шаҳар полицияси бошлиғи ишдан кетиши кераклигини айтишган. Намойишчиларнинг қўлида «Ойзаданинг ўлдирилиши учун ким жавоб беради?», «Ким ҳамон қотилликни анъанага деб ҳисоблайди?” деб ёзилган баннерлар бор эди.
Қирғизистон Бош вазири Улуғбек Марипов намойишчилар олдига етиб келди ва полицияга мазкур жиноятни фош қилиш учун вақт беришни сўраган. Президент Садир Жапаров ҳам ушбу ҳолат бўйича баёнот бериб, айбдорлар жазоланишини айтди ва Канатбекованинг ўлимини «фожеа» деб атади.
Бирлашган Миллатлар Ташкилотининг Бишкекдаги ваколатхонаси маълумотларига кўра, 6. 5 миллион киши яшайдиган Қирғизистонда ҳар бешта никоҳдан биттаси келин ўғирлашдан сўнг тузилади.
Uzbek