Мутахассисларнинг таъкидлашича, грипп эпидемияси ва ўткир респиратор касалликларнинг олдини олишда вакцинация жуда муҳим ўрин тутади. Бунда фақат кишининг умумий аҳволи ва саломатлигига боғлиқ шикоятларидан келиб чиқиб вакцинация ҳолати белгиланиши мумкин.
Шунда ҳам эмланишдан аввал албатта шифокор кўригидан ўтиш тавсия этилади. Имкони борича эмлашга қадар 2 ҳафта давомида шамоллаш, тумов каби ҳолатлар кузатилмаслиги керак.
Ҳомиладор аёллар ва ёш болалар учун эса шифокор кўриги ва хулосаси белгиланади.
Гриппга қарши эмлашда баъзи чекловлар бор.
Мисол учун, аллергик ҳолатларга мойиллик бўлса, инфекцион хасталик ва юқори ҳароратда, буйрак фаолиятининг ўзгаришида, асаб ва эндокрин тизими, қон билан боғлиқ касалликлар, 6 ойгача бўлган болалар учун таъқиқланади.
Эмланадиган киши шамоллаш, нафас олиш йўллари яллиғланиши каби касалликлардан тамоман соғлом бўлиши керак. Мабодо бу ҳолат кузатилса, эмлаш ишлари вақтинча тўхтатилиб турилади.
Эмлатиш мавсумий касалликлар вақтида ҳомиладорликни режалаштираётган аёллар, 6 ойликдан 23 ойликкача бўлган болалар ҳамда иммун тизимининг суст, мунтазам шамоллаш ҳолатларидан азият чекадиганларга бу албатта керак.
Айниқса, грипп билан касалланган кишилар бор муассасада ишловчи тиббиёт ходимлари учун эмлаш зарурий ҳисобланади. Гриппга қарши эмланганлар орасида олиб борилган тадқиқотларга кўра, эмлашдан сўнг касалликка чалиниш хавфи 70-90 фоизга камаяди. Уй шароитида гриппдан ҳимояланиш учун эса кунора бўлса-да, бурун тешикларини ишлатилмаган кир ювиш совуни ёки махсус бактерияларга қарши ишлатиладиган воситаларда чайиш керак.
Бу муолажани уйдан кўчага чиқишда ва қайтишда бажариш лозим. Болаларга боғча, мактабга отланишдан аввал оксолин мазини бурун атрофига суртиш тавсия этилади.
Энг муҳими, ҳар бир оила аъзоси бу тартибга риоя этиши керак. Чунки, бир кишининг инфекция билан зарарланиши бошқаларига ҳам юқиш эҳтимолини келтириб чиқаради.
Маълумотларга эътибор қиладиган бўлсак, дунёда гриппнинг икки мингдан ортиқ тури бўлиб, ҳар йили дунё миқёсида грипп асоратлари туфайли 250 -500 минг киши ҳалок бўлаётган экан.
Албатта, бу кичик рақамлар эмас. Соғлиғимиз ўз қўлимизда экан, гриппдан ҳимояланиш чораларини кўришимиз шарт.
Муаллиф: Ф.Аҳмаджонов
Uzbek