Аксарият футболчилар ва мухлислар жамоанинг сардори ким бўлишига унчалик аҳамият беришмайди. Улар кўпроқ қайғурадиган нарса бу натижадир.
Миср терма жамоасининг янги бош мураббийи Хоссам Эл-Бадри супер юлдуз Муҳаммад Салоҳга сардорлик боғичини беришни истайди. Лекин жамоадаги энг катта ўйинчи бўлган 34 ёшли Аҳмад Фатих сардорликни беришни рад этиб келмоқда. Мисрнинг энг яхши клубларидан бири бўлган «Ал-Аҳли»да тўп сураётган ҳимоячи Фатих 2002 йилда терма жамоадаги фаолиятини бошлаган бўлиб, ҳозиргача термада 131 та учрашувда майдонга тушган. Шунингдек, у Англияда «Шеффилд Юнайтед» ва «Халл Сити» жамоаларида ҳам ўйнаган.
«Мен сардорликни фақатгина ёши катта футболчига эмас, балки жамоага етакчилик қила оладиган ўйинчига беришни хоҳлайман. Футболчилардан сардорликка ким лойиқ эканлиги ҳақида фикрларини сўрайман, чунки бизга юлдуз керак», дейди Эл-Бадри.
Шубҳасиз, «Ливерпул» юлдузи Муҳаммад Салоҳ дунёнинг энг яхши футболчиларидан бири. У Англия Премьер лигасининг икки карра энг яхши тўпурари ва Чемпионлар Лигаси соҳиби ҳисобланади. Салоҳ терма жамоа сафида 67 та учрашув ўтказиб, 41 та гол урган. Бу Миср термаси учун рекорд натижадир.
Uzbek