Миср президенти Абдул Фаттоҳ Ал-Сиси Африканинг 30 мамлакатига коронавирус билан курашда фойдаланиш учун 4 миллион АҚШ доллари қийматидаги тиббий ёрдам юборишни буюрди. Бу ҳақда Миср Вазирлар Маҳкамаси хабар берган.
Бу Мисрнинг Африкада COVID-19 га қарши курашиш учун тузилган фондга бераётган моддий кўмакларидан бири ҳисобланади. Вазирлар Маҳкамасидагиларнинг айтишича, ушбу ёрдамнинг биринчи қисми аллақчон 10 та мамлакатга жўнатилиб бўлинди. Айни пайтда қолган 20 та мамлакатга тиббий ёрдамни етказиб бериш ишлари охирига етказилмоқда.
Миср Ташқи ишлар вазирининг ўринбосари Соҳа Генди ёрдамни қабул қилиб олаётган бир неча мамлакатларнинг элчиларини Қоҳира халқаро аэропортида кутиб олган. Ушбу ёрдам режасига кўра, ҳар бир мамлакатга 1.5 тонна миқдоридаги тиббий жиҳозлар етказиб берилади.